یەك مانگەكەی حكومەتی عێراقیش تێپەڕی و كەس نەگەڕایەوە جەلەولا

زیاتر لەمانگێكjalawla لەمەوبەر حكومەتی عێراقی، وادەی یەك مانگی دیاری كرد بۆ گەڕانەوەی دانیشتوانی جەلەولا بۆ ناوچەكەیان، بەڵام مانگەكەش تێپەڕی و كەس نەگەڕایەوە، بەڕێوەبەری شارەدێکەش دەڵێ "حكومەتی عێراقی تاك لایەنە ئەو بڕیارەی داوە، بۆیە گەڕانەوەكە جێبەجێ‌ نەكرا".

ئەنوەر حسێن دزەیی، بەڕێوەبەری شارەدێی جەلەولا لە لێوانێكدا بۆ (تۆڕی میدیای رووداو) ئاماژە بەوە دەكات لە ١٩-٢-٢٠١٥ حكومەتی عێراقی بەسەرۆكایەتی عامر ئەلمەجمەعی، پارێزگاری دیالە لیژنەیەكی دروستكردوە بۆ گەڕانەوەی دانیشتوانی جەلەولا، بەڵام مانگەكەش تێپەڕیوە و كەس نەگەڕاوەتەوە، دەشڵێت"حكومەتی عێراقی تاكە لایەنە ئەو بڕیارەی داوە نەك بە هاوبەشی لەگەڵ حكومەتی هەرێمی كوردستان، هەرچەندە ماوەی مانگێكیشی بۆ جێبەجێ‌ كردنی دیاری كردبوو، بەڵام مانگێك زیاتر تێپەڕیوە و هێشتا كەس نەگەڕاوەتەوە".

بەڕێوەبەری ناحیەی جەلەولا ئەوەش رووندەكاتەوە " جەلەولا لەهەموو جۆرە تەقەمەنییەك پاكکراوەتەوە، بەڵام هێشتا ناوچەیەكی سەربازی داخراوە و دەبێت بە بڕیارێكی هاوبەشی حكومەتی هەرێمی كوردستان‌ و حكومەتی عێراق خەڵك بگەڕێتەوە".

جەلەولا كە ٣٦ گوندی لەسەرە، سەر بە پارێزگای دیالە و قەزای خانەقینە‌، ژمارە دانیشتوانی بە گوندەكانیەوە ٨٦ هەزار كەسە كە ٥٥ هەزاریان لەنێو جەلەولا نیشتەجێبوون.

چەكدارانی داعش لە ١٠-٨-٢٠١٤ چوونە نێو جەلەولا و لە ٢٣-١١-٢٠١٤ پێشمەرگە توانی كۆنتڕۆڵی بکاتەوە.